TULADHA PAMBAGYAHARJA PRALENAN

Innalillahi Wainna Illahi Roji’un

Assalamu’alaikum Wr. Wb.

Purwo madyo wasono.

Satuhunipun kita sadaya kagunganipun Gusti Ingkang Akarya Jagat. Satemah bade wangsul wonten ngarsanipun kados rikalenggahan meniko sampun katimbalan marak sowan wonten ngayunanipun Gusti Ingkang Murbeng Gesang, kadang kula………………….. kanthi tentrem rikala tabuh ……………………. dumugi yuswa……………… jalaran gerah sawetawis wekdal.

Dumateng panjenenganipun para pelayat kakung sumawana putri ingkang kula bekteni, kula kinarya talanging basa ........................................ sepisan ngaturaken wilujeng rawuh. Dene kaping kalih, sadaya kulawarga ngaturaken panuwun ingkang tampa pepindan, menggah sadaya pambiyantunipun ingkang arupi wujud menopo kemawon. Mugi-mugi sih kadarman panjenengan dadosa ngamal kasaenan saha katampi dening Allah SWT sageta angsal leliru ingkang satraju saha bebingah ingkang malimpah-limpah.

Para takdiyah-takdiyin, sejatosipun para kulawarga sampun mbudi daya amrih waluyo jati, jati temahan nirmala, nanging pambudi daya kalawau gagar wigar datampo karya. Kridaning pambudi tan kumawi bedah kutating pasti, budi dayaning manungsa tan bisa ngungkuli garising kawoso, insani namung sak dremi bekti saha nglampahi.

Kula kinarya wakilipun kulawarga nyuwunaken pangapunten dumateng kadang sutrisno, duk rikala sugengipun almarhum/almarhummah anggadahi kalepatan dumateng panjenengan sami. Para takdiyah-takdiyin sadaya ingkang gesang meniko bade pejah (khulunafsin daikhotul maut).

Mila kanthi papesthen punika, sumangga kita ikhlasaken arwahipun almarhum/almarhummah ...................................... ingkang sampun marak sowan wonten ngayunanipun Gusti Ingkang Akarya Jagad, kanthi puji donga mugi-mugi arwahipun tinampi wonten ngayunanipun Allah SWT, dipun apunten sadaya dosa lan kalepatanipun, dipun paringana papan ingkang jumbuh kaliyan lelabetipun dhumateng bangsa, negari dalah agami, punapa dene bebrayan agung. Mugi-mugi ingkang tinilar, dipun paringana tabah, tawakal, sentosa manahipun.

Semanten ugi kula kinarya talanging basa hambok bilih wonten kiranging  subasita ingkang singlar ing reh tata krami kula tansah nyuwun sih lumunturing samudra pangaksami.

Aakhirul kalam, billahi taufik wal hidayah.

Wassalamu’alaikum Wr. Wb.

TULADHA ATUR BELASUNGKAWA SAHA PANGLIPUR

Assalamu’alaikum Wr. Wb.

Kawula nuwun,

Panjenenganipun para pepundhen, para sesepuh, para pinisepuh, ingkang pantes pinundhi saha kinabekten.

Keparenga kawula ing mriki, minangka talanging basa saking warga ageng Kalurahan ……………………, saperlu atur belasungkawa wonten madyaning dhuhkita ing siyang kalenggahan punika. Kanthi puput yuswanipun panjenenganipun Bapa/Ibu …………………… warga ageng Kalurahan ……………………, rumaos kecalan satunggaling pepundhen ingkang sanget dipun tresnani. Langkung-langkung menawi ngemuti sepintenta lelabetipun almarhum/almarhumah rikala sugengipun, anggenipun tansah hanuntun, hamomong, saha hanggulawenthah ingkang lerekipun dhateng kasaenan, karukunan, saha katentreman ing bebrayan agung. Pramila dhumateng sedanipun Bapa/Ibu ……………………. Warga ageng Kalurahan ……………………, Ndherek belasungkawa ingkang salebet-lebetipun, bebasan ngantos kandhas mandhesing raos matrenyuh.

Ingkang punika dhumateng panjenenganipun Bapa/Ibu ………………….. sagotrah, ingkang katemben kapanduking dhuhkita, kawula mangertos kados pundi gempiling penggalih panjenengan labet kapedhotan katresnan tinilar ingkang rama/ibu marak wonten ngayunanipun Pangeran. Mangka cihna panjenengan taksih kepingin tinengganan, pramila boten kendhat anggen panjenengan tansah mbudidaya pados usada, murih ingkang rama/ibu nirmala waloya temahan jati, jati temahan waloya, nanging sedaya wiradat kalawau boten saget ngungkuli garising kodrat, ateges gagar wigar datanpa karya. Hambok bilih punika mapan sampun dados garising pasthi, kawengku dening jidharing papesthen, jer papesthen punika awit saking karsaning Gusti Ingkang Murbeng Gesang. Kridhaning pambudi tan kumawi mbedhah kuthaning pasthi, budidayaning manungsa tan bisa ngungkuli garising Kawasa. Sanadyan kados pundhi pambudidayanipun titah ihtiyaripun manungsa, menawi sampun kinarsakaken ing Gusti, titah namung pasrah sumarah, insani namung sadremi bekti saha nglampahi.

Mila kanthi papesthen punika, sumangga kita ikhlasaken arwahipun almarhum/almarhumah ingkang sampun marak sowan wonten ngayunanipun Gusti Ingkang Akarya Jagad, kanthi puji donga mugi-mugi arwahipun tinampi wonten ngayunanipun Allah SWT, dipun apunten sadaya dosa lan kalepatanipun, dipun paringana papan ingkang jumbuh kaliyan lelabetipun dhumateng bangsa, negari dalah agami, punapa dene bebrayan agung.

Semanten ugi ingkang tinilar, dipun paringana tabah, tawakal, sentosa manahipun, sahengga saget netepi punapa ingkang dados kekudanganipun tiyang sepuh. Salah satunggilipun  kekudanganipun tiyang sepuh punika, menawi para putra menika dados putra ingkang sholeh.

Jumbuh kaliyan Sabda Rasulullah SAW : “Idzaa maata bnu aadamu inqatha’a amaluhu, illaa min tsallaatsin”, : Tiyang punika menawi sampun puput yuswa amalipun mandeg, ingkang dipun beta namung tiga. Mila menawi tiyang puput yuswa, dipun paringi gelu, tegesipun tugel amale sing digawa mung telu. Ingkang sepisan : “Shadaqatin jaariyatin”, amal jariah. Ingkang angka kalih : “Au’ilmin yuntafa’u bihi”, ngilmu ingkang migunani. Kekalihipun punika sampun rinegem dening panjenenganipun almarhum/almarhumah duk rikala sugengipun. Ingkang angka tiga : “Aau waladin shaalidin yad’uu lahu”, putra ingkang sholeh inggih punika putra ingkang tansah ndedongakaken dhateng tiyang sepuhipun. Menawi para putra tansah ndedongakaken, nyuwunaken pangapunten sadaya kalepatanipun tiyang sepuhipun, ateges putra punika saget nyuwargakaken dhateng tiyang sepuh. Dados putra ingkang mekaten punika, sampun saget dipun westani, putra ingkang sampun saget mikul dhuwur mendhem jero dhumateng tiyang sepuh.

Hambok bilih namung semanten ingkang saget kawula aturaken, mugi-mugi saget dados panglipuring batos. Minangka puputing atur, menawi wonten keladuking pangucap nyuwun pangapunten.

Aakhirul kalam, billahi taufik wal hidayah.

Wassalamu’alaikum Wr. Wb.

TULADHA ATUR PAMBUKA PANATACARA WONTEN ING PAWIWAHAN TEMANTEN

Assalamu’alaikum Wr. Wb.

Kawula nuwun, panjenenganipun para pepundhen, para sesepuh, para pinisepuh ingkang satuhu sampun pana ing pamawas, lebda ing pitutur, keblat ing panembah, ingkang pantes pinundhi saha kinabekten.

Panjenenganipun para priyagung dharaning nata, para sarjana sujaneng budi, para pangemban pangembating praja, para satriyaning negari, mangka pandam pandoming para kawula dasih, ingkang pantes katuran sagunging pakurmatan.

Para alim ulama, ingkang rinten dalu tansah sumandhing kitab suci Wahyuning Illahi, minangka panuntun keblating panembah, ingkang satuhu luhuring budi.

Para baraya wira wiyata, ingkang mastuti ing reh kridhaning budaya myang karya.

Para purna karya labet praja, ingkang mahambeg luhuring darma,miwah para kadang sutresna, mudha wredha ingkang pantes sinudarsana, punapa dene para tamu kakung sumawana putri ingkang dahat kalingga murdaning akrami.

Kanthi pepayung budi rahayu, miwah ngaturaken sewu agung aksama, mugi pinarengna kawula hambuka wiwaraning suka wenganing wicara dwaraning kandha,nun inggih mradapa awit saking keparengipun ingkang hamangku gati, kawula piniji hanjejeri minangka pangendhaliwara, saperlu mratitisaken murih rancaking titilaksana adicara pawiwahan prasaja ing hari/ratri kalenggahan punika.

Saderengipun kawula ngaturaken menggah reroncening tata adicara, kinarya hamurwani lekas wekasing karti gatining karya, murih purwa madya wasana tansah manggih rahayu kalis ing rubeda nir ing sambekala, sumangga langkung rumiyin kawula dherekaken manungku puja, ngunjukaken sembah puji syukur wonten ngarsanipun Gusti Ingkang Murbeng Dumadi, ingkang sampun kepareng paring rahmad lan nikmat gumelaring alam agesang wonten madyaning bebrayan agung, katitik rahayu sagung dumadi tansah kajiwa lan kasalira dhumateng panjenengan sadaya dalasan kawula, sahengga kita saged hanglonggaraken penggalih, haminakaken wanci saha kaperluan rawuh kempal manunggal wonten sasana pawiwahan/pahargyan mriki, saperlu hanjenengi saha paring berkah pangestu dhumateng panjenenganipun Bapa/Ibu ………………………… (ingkang mengku gati) anggenipun hanetepi darmaning sepuh, hangrakit sekar cepaka mulya, hamiwaha putra mahargya siwi, tetepa winengku ing suka basuki.

Para rawuh kakung sumawana putri, wondene menggah reroncening tata adicara ingkang sampun rinancang, rinacik, rinumpaka dening para kulawangsa nun inggih :

Minangka purwakaning adicara, tinarbuka sowanipun temanten putri mijil saking tepas wangi, manjing ing madyaning sasana rinengga.

Tanggap Risang Duta Pamethuk dupi hamersani atmaja temanten putri lenggah anggana raras, tumunten bidhal dhumateng paleremanipun putra temanten kakung, saperlu kajengkarakaken tumuju dhumateng sasana pawiwahan.

Sasampunipun putra temanten rawuh wonten ing sasana rinengga, tumunten kalajengaken adicara pasrah panampi.

Paripurna adicara pasrah panampi, kalajengaken dhaup panggihing putra temanten anut satataning adat Widhiwidana ingkang sampun sinengker, tumunten kalajengaken upacara krobongan.

Madyaning suka ing kalenggahan punika boten kekilapan kadang besan sutresna, lekasing sedya ugi ndherek mangayubagya keparengipun ingkang hamengku gati, mila lajeng manjing wonten sasana pawiwahan, ginarubyug sagunging para kadang santana, tumunten kalajengaken upacara sungkeman.

Ing salajengipun panjenenganipun ingkang hamengku gati badhe marak ngabyantara sami, saperlu ngaturaken pambagyaharja katur panjenenganipun sagung para tamu.

Paripurna atur pambagyaharja, temanten sarimbit badhe kalengser saking madyaning sasana wiwaha, manjing sasana busana, saperlu rucat busana kanarendran, santun busana kasatriyan.

Sasampunipun temanten sarimbit paripurna hangagem busana kasatriyan, tumunten kasowanaken malih wangsul ngabyantara para tamu, saperlu nyenyadhang pudyastawa mrih widadaning bebrayan.

Wondene minangka pratandha paripurnaning pahargyan, menawi temanten sarimbit sampun jengkar saking sasana rinengga, tumuju wiwaraning pawiwahan, tandha yekti pawiwahan sampun purna.

Mekaten menggah reroncening tata adicara pawiwahan prasaja ing hari/ratri kalenggahan punika. Ing salajengipun keparenga para tamu pinarak ing palenggahan kanthi mardu-mardikaning penggalih, miwah kula dherekaken hanyrantos tumapaking adicara, sinambi nglaras rarasing gendhing-gendhing ingkang sampun cinandhi ing pita swara, ingkang badhe kaaturaken dening kadang panata pita swara. Nuwun, nuwun, matur nuwun.

Wassalamu’alaikum Wr. Wb.

TULADHA ATUR PASRAH LAMARAN

Assalamualaikum Wr.Wb.

Panjenenganipun para pepundhen, para sesepuh, para pinisepuh ingkang hanggung mastuti dhumateng pepoyaning kautaman, ingkang pantes pinundhi saha kinabekten, punapa dene panjenenganipun para tamu kakung sumawana putri ingkang dahat kalingga murdaning akrami.

Kanthi pepayung budi rahayu saha hangunjukaken raos suka syukur dhumateng Gusti, “Mugi Rahayuha Sagung Dumadi”, tansah kajiwa lan kasalira dhumateng panjenengan sadaya hangluberana dhumateng kawula.

Amit pasang aliman tabik, mugi tinebihna ang iladuni myang tulak sarik, dene kawula cumanthaka marak mangarsa hanggempil kamardikan panjenengan ingkang katemben wawan pangandikan, inggih awratipun hamestuti jejibahan luhur kula piniji minangka duta saraya sulih sarira saking panjenenganipun Bp. ……………..……….. sekalihan.

Panjenenganipun Bp. …………………… sekalihan garwa (ingkang mengku gati) ingkang pantes katuran sagunging pakurmatan, kula pinangka sulih sarira saking panjenenganipun Bp. ……………………….. sekalihan, ingkang sepisan; ngaturaken salam taklim mugi katur wonten ngarsa panjenengan, sumarambah para kulawarga samudayanipun.

Jangkep kaping kalih; ing nguni sampun wonten pirembagan, ing antawisipun Bp. ………………………. sekalihan, hanggadhahi putra kakung kekasih pun Bg. ……………………. kaliyan Bp. …………………… sekalihan garwa (ingkang mengku gati) hanggadhahi kenya siwi sesilih Rr. …………………………. Gumolonging pirembagan nedya hangraketaken balung pisah daging arenggang, bebasan ngebun-ebun enjang anjejawah sonten, ndhodhok latar ndhodhog lawang sumedya nginang jambe suruhe, kanthi atur makaten karana sampun jumbuh anggenipun pepetangan, saha sampun manunggal cipta, rasa, miwah karsa, ingkang punika saking agenging manah panjenenganipun Bp. ……………………………….. sekalihan, anggenipun katampi panglamaripun pramila ing kalenggahan punika, ngaturaken sarana miwah upakarti pinangka jangkeping tatacara salaki rabi.

Wondene ingkang badhe kaaturaken wonten ngarsanipun Bp. ………………….. sekalihan garwa inggih punika;

Sanggan saha majemuk ingkang sampun wonten wujudipun, kanthi pangajabing sedya dadosa sarana sahipun sesanggeman miwah raketing kekadangan, saengga mboten pisah salami-laminipun.

Kasoking katresnan Bp. ………………………. sekalihan dhumateng  Bp. …………………… sekalihan garwa, ing mriki badhe ngaturaken malih ageman ingkang awujud ……………………………………………, ing pangajab pinangka agemanipun badhe/calon penganten putri.

Mboten kekilapan Bp. …………………………… sekalihan ngaturaken redana wujudipun arta, kenginga damel ngentheng-enthengi anggenipun Bp. ………………….. sekalihan garwa (ingkang mengku gati) netepi darmaning sepuh hamiwaha putra mahargya siwi. Kajawi punika, panyuwunipun Bp. ………………………… sekalihan, ing benjang menawi sampun dumugi titiwanci tumapaking gati, mugi calon penganten kaijabna saha kapanggihna anut satataning agami miwah adat widhiwidana ingkang sampun lumampah wonten ing mriki.

Minangka pungkasaning atur, hambok bilih Bp. …………………………… sekalihan anggenipun ngaturaken sarana dalah upakarti wonten kekiranganipun, mawantu-wantu nyuwun agenging samodra pangaksami. Semanten ugi kula minangka sulih sarira saking panjenenganipun Bp. …………………………. Sekalihan, menawi wonten gonyak-ganyuking wicara miwah kiranging suba sita ingkang singlar ing reh tata krami, kawula nyuwun sihing samodra pangaksami.

Aakhirul kalam, billahi taufik wal hidayah,

Wassalamu’alaikum Wr. Wb.

TULADHA ATUR PANAMPI PASRAH LAMARAN

Assalamualaikum Wr. Wb.

Dhumateng panjenenganipun Bapa ………………………..(ingkang pasrah) ingkang piniji angembani wuwus, mangka duta saraya, sulih sarira saking panjenenganipun Bapa ……………………….. sekalihan garwa (badhe/calon kadang besan) ingkang pantes sinuba sagunging pakurmatan.

            Kanthi linambaran trapsila ing budi, miwah ngaturaken sewu agunging pangaksama, inggih awit mradapa keparengipun Bapa ……………………….. sarimbit garwa (ingkang mengku gati), kula piniji talanging basa, kinen hanampi menggah wosing gati lekasing sedyo ingkang luhur saking panjenenganipun Bapa ……………………….. sekalihan, lumantar panjenangipun Bapa ……………………….. (ingkang pasrah).

Minangka purwakaning atur, ngaturaken pambagya sugeng rawuh saha ngaturaken gunging panuwun ingkang tanpa pepindhan, dene lampah panjenengan sampun kasembadaning karya, kanthi wilujeng nirbaya nirwikara boten wonten pringga bayaning marga.

Sanget katampi kanthi bingahing manah, atur salam taklim saking panjenenganipun badhe/calon kadang besan lumantar panjenengan kula tampi, salajengipun dhumawaha sami-sami.

Wondene atur pasrah paringipun sarana jejangkeping salaki rabi, kula tampi kanthi suka bingahing manah, ing salajengipun mangke badhe kula aturaken wonten ngarsanipun Bapa ……………………….. sekalihan (ingkang mengku gati). Mboten kekilapan panjenenganipun Bapa ……………………….. sekalihan, namung ngaturaken agenging panuwun menggah sadaya peparingipun badhe/calon kadang besan sutresna, pratandha yekti kasoking katresnan dhumateng Bapa ……………………….. sekalihan (ingkang mengku gati), mugi dadosa sarana raketing kekadangan, sami-sami netepi darmaning sepuh anggennya ngentas pitulus putra pinaringan raharja mulya.

Amung semanten panampi saking Bapa ……………………….. sekalihan (ingkang mengku gati) lumantar kula, ngaturi uninga bilih menawi sampun dumugi wahyaning mangsa kala tumapaking ijab utawi panggih, kasuwun panjenenganipun Bapa ……………………….. sekalihan garwa (badhe/calon kadang besan) wontena suka lilaning penggalih hanjenengi paring pudyastuti murih rahayuning sedya.

Minangka pungkasaning atur, hambok bilih menawi wonten kuciwaning bojakrami, anggen kula hanampi menggah ing rawuh panjenengan sami, mugi lumeberna sih samodra pangaksami. Semanten ugi, kula minangka talanging basa, hambok bilih wonten gonyak-ganyuking wicara, cawuh kisruhing paramasastra, miwah kiranging subasita ingkang singlar ing reh tata krama, kupat janure klapa, menawi lepat nyuwun pangaksama.

Wassalamualaikum Wr. Wb.

TULADHA ATUR PANAMPI PASRAH TEMANTEN SEKALIAN

Assalamualaikum Wr. Wb.

Dhumateng panjenenganipun Bapa ………………………..(ingkang pasrah) ingkang piniji angembani wuwus, mangka duta saraya, sulih sarira saking panjenenganipun Bapa …………….. sarimbit ingkang pantes sinuba sagunging pakurmatan.

Kanthi linambaran trapsila ing budi, miwah ngaturaken sewu agunging pangaksama, inggih awit mradapa keparengipun Bapa/Ibu ……………….. (ingkang mengku gati), kula piniji talanging basa, kinen hanampi menggah wosing gati lekasing sedyo ingkang luhur saking panjenenganipun Bapa …………………….. sarimbit lumantar panjenangipun Bapa …………………………………

Minangka purwakaning atur, ngaturaken pambagya sugeng rawuh saha ngaturaken gunging panuwun ingkang tanpa pepindhan, dene lampah panjenengan sampun kasembadaning karya satemah saget nglarapaken sekar cepaka mulya sarimbit, inggih putra temanten sekalian, kanthi wilujeng nir baya nirwikara boten wonten pringga bayaning marga.

Sanget katampi kanthi bingahing manah, salam taklim saking panjenenganipun Bapa ………………… sarimbit, ingkang salajenganipun badhe kula aturaken wonten ngarsanipun Bapa/Ibu ……………….. (ingkang mengku gati), mugi-mugi awit saking pangestunipun, sageta handayani anggenipun mengku karya, hanetepi darmaning asepuh, hangrakit sekar cepaka mulya, hamiwaha putra mahargya siwi tetepa winengku ing suka basuki.

Semanten ugi, lumaraping sekar cepaka mulya sarimbit, inggih pasrahipun temanten sekalian katampi kanthi suka renaning penggalih. Suka bingahing manah saking panjenangipun Bapa/Ibu ……………….. (ingkang mengku gati), menawi kenging kawedhar ing akathah, saha kepareng rinumpaka ing ukara, kadi kajrugukan wukir sari kabelebeging samudra madu. Mboten kekilapan panjenenganipun Bapa/Ibu ……………….. (ingkang mengku gati), namung ngaturaken agenging panuwun menggah sadaya peparingipun kadang besan, pratandha yekti kasoking katresnan dhumateng Bapa/Ibu ……………….. (ingkang mengku gati), mugi dadosa sarana raketing kekadangan, sami-sami netepi darmaning sepuh anggennya ngentas pitulus putra pinaringan raharja mulya.

Dhumateng panjenenganipun Bapa ………………………….. dalah pangaraking putra temanten sekalian, kula suwun pinarak ing palenggahanipun kanthi mardu mardikaning penggalih, ngantos dumugi paripurnaning pawiwahan, saperlu hangestreni tuwin paring berkah pangestu dhumateng temanten sarimbit mugi-mugi anggenipun badhe lelumban wonten madyaning bebrayan agung, tansah manggih bagya mulya ingkang sinedya, rahayu ingkang tinuju, basuki ingkang kaesthi, miwah tansah gagah ingkang jinangkah.
Minangka puputing atur, menawi wonten kuciwaning boja krami, anggen kawula hangacarani menggah ing rawuh panjenengan sami, mugi lumeberna sih jalanidhi pangaksami. Semanten ugi, kula minangka talanging basa, hambok bilih anggen kawula matur wonten kiranging subasita ingkang singlar ing reh tata krama, kula tansah nyuwun lumunturing sih samudra pangaksami.

Wassalamualaikum Wr. Wb.

TULADHA ATUR PANAMPI PASRAH TEMANTEN KAKUNG

Assalamualaikum Wr. Wb.
Dhumateng panjenenganipun Bapa ……………………….. (ingkang pasrah) ingkang piniji angembani wuwus, mangka duta saraya, sulih sarira saking panjenenganipun Bapa ……………………….. sarimbit ingkang pantes sinuba sagunging pakurmatan.

Kanthi linambaran trapsila ing budi, miwah ngaturaken sewu agunging pangaksama, inggih awit mradapa keparengipun kadang kula ……………………….. sarimbit, kula piniji talanging basa, kinen hanampi menggah wosing gati lekasing sedyo ingkang luhur saking panjenenganipun Bapa ……………………… sarimbit lumantar panjenangipun Bapa ……………………

Minangka purwakaning atur, ngaturaken pambagya sugeng rawuh saha ngaturaken gunging panuwun ingkang tanpa pepindhan, dene lampah panjenengan sampun kasembadaning karya satemah saget nglarapaken sekar cepaka mulya sasele, inggih putra calon temanten kakung pun Bagus ……………………….., kanthi wilujeng nir baya nirwikara boten wonten pringga bayaning marga.

Sanget katampi kanthi bingahing manah, salam taklim saking panjenenganipun Bapa ……………………….. sarimbit, ingkang salajenganipun badhe kula aturaken wonten ngarsanipun Bapa ……………………….. sarimbit, mugi-mugi awit saking pangestunipun, sageta handayani anggenipun mengku karya, hanetepi darmaning asepuh, hangrakit sekar cepaka mulya, hamiwaha putra mahargya siwi tetepa winengku ing suka basuki.

Semanten ugi, lumaraping sekar cepaka mulya sasele, inggih pasrahipun putra calon temanten kakung katampi kanthi suka renaning penggalih. Suka bingahing manah saking panjenangipun Bapa ……………………….. sarimbit, menawi kenging kawedhar ing akathah, saha kepareng rinumpaka ing ukara, kadi kajrugukan wukir sari kabelebeging samudra madu. Ing salajengipun, menawi sampun dumugi titiwanci tumapaking gati tumunten badhe kapanggihaken anut satataning adat widhiwidana ingkang sampun sinengker ing tlatah ………………………….., saha badhe kabiwadha sakadaripun dening panjenangipun Bapa ……………………….. sakukuban.

Dhumateng panjenenganipun Bapa ………………………….. dalah pangaraking putra calon temanten kakung, sasampunipun mangke putra calon temanten kapanggihaken, kula suwun pinarak ing palenggahanipun kanthi mardu mardikaning penggalih, ngantos dumugi paripurnaning pawiwahan, saperlu hangestreni tuwin paring berkah pangestu dhumateng temanten sarimbit mugi-mugi anggenipun badhe lelumban wonten madyaning bebrayan agung, tansah manggih bagya mulya ingkang sinedya, rahayu ingkang tinuju, basuki ingkang kaesthi, miwah tansah gagah ingkang jinangkah.

Minangka puputing atur, menawi wonten kuciwaning boja krami, anggen kawula hangacarani menggah ing rawuh panjenengan sami, mugi lumeberna sih jalanidhi pangaksami. Semanten ugi, kula minangka talanging basa, hambok bilih anggen kawula matur wonten kiranging subasita ingkang singlar ing reh tata krama, kula tansah nyuwun lumunturing sih samudra pangaksami.

Wassalamualaikum Wr. Wb.

TULADHA ATUR PAMBAGYAHARJA TEMANTEN

Assalamu’alaikum Wr. Wb.

Kawula nuwun, dhumateng panjenenganipun para pepundhen, para sesepuh, para pinisepuh ingkang satuhu sampun pana ing pamawas, lebda ing pitutur, keblat ing panembah, ingkang pantes pinundhi saha kinabekten.

Panjenenganipun para sarjana sujaneng budi, para priyagung pangemban pangembating praja, para satriyaning negari, minangka pandam pandoming para kawula dasih, ingkang pantes katuran sagunging pakurmatan.

Para kadang mitra, wredha mudha ingkang pantes sinudarsana, sumrambahipun dhumateng panjenenganipun para tamu kakung sumawana putri ingkang dahat kalingga murdaning akrami.

Kanthi linambaran trapsila ing budi, miwah ngaturaken sewu agunging pangaksama, mugi pinarengna kula hambuka wiwaraning suka, wenganing wicara, duwaraning kandha, kanthi cumanthaka marak mangarsa hanggempil kamardikan panjenengan ingkang katemben wawan pangandikan, inggih awit mradapa keparengipun ingkang hamengku gati, nun inggih panjenenganipun Bapa/Ibu ……………….. (ingkang mengku gati), kawula piniji hangembani wuwus minangka talanging basa, kinen hangaturaken menggah wudharing gantha, babaring sedya, wigatosing gati ing siyang/dalu kalenggahan punika. Inggih kabekta saking mongkoking manah saha karoban ing sih panjenengan sami, saengga boten kumawi matur piyambak, jrih menawi boten saged kawiyosipun lathi, namung kandheg wonten ing jangga, mila lajeng hanyaraya dhumateng kawula.

Nanging saderengipun kawula hamurwani lekas wekasing karti gatining sedya,  supados purwa madya wasana tansah manggih rahayu kalis ing rubeda nir ing sambekala, keparenga langkung rumiyin kawula dherekaken ngunjukaken puji syukur wonten ngarsanipun Gusti Allah SWT, ingkang sampun kepareng paring rahmad lan nikmat gumelaring alam agesang wonten madyaning bebrayan agung, katitik rahayu sagung dumadi tansah kajiwa lan kasalira dhumateng kula lan panjenengan sadaya, sahengga kita saged hanglonggaraken penggalih, haminakaken wanci saha kaperluan rawuh kempal manunggal wonten dalem pawiwahan/pahargyan mriki, kanthi pangajab saha hanunggil raos hangestreni  saha paring berkah pangestu dhumateng panjenenganipun Bapa/Ibu ………………………… (ingkang mengku gati) anggenipun hangrakit sekar cepaka mulya, hamiwaha putra mahargya siwi, tetepa winengku ing suka basuki.

Para lenggah ingkang sinuba sagunging pakurmatan madyaning pawiwahan prasaja ing siyang/dalu kalenggahan punika, panjenenganipun Bapa/Ibu ……………….. (ingkang mengku gati) ngambali ngaturaken sugeng rawuh, sinarengan raos panuwun ingkang tanpa pepindhan, suka bingahing manah ngantos boten saged rinumpaka ing ukara, menggah karawuhan panjenengan sami. Ing salajengipun mugi kasekecakna pinarak ing palenggahan kanthi mardu-mardikaning penggalih ngantos dumugi paripurnaning pahargyan.

Wondene menggah wigatosing gati panjenenganipun Bapa/Ibu …………………. hangaturi rawuh panjenengan, kados dene ingkang sampun kacetha wonten ing serat sedhahan (kintaka wara), bilih panjenenganipun Bapa/Ibu …………………., hanetepi darmaning sepuh hamiwaha putra mahargya siwi, ngentas pitulus kenya putrinipun ingkang sesilih Rara ………………….., jinatukrama/dhaup kaliyan Bagus …………….., putra kakungipun Bapa/Ibu …………………….., ingkang pidalem ing ……………… ingkang sampun kalampahan ijab miturut satataning agami lan negari, panggih miturut satataning adat widhiwidana ingkang sampun lumampah ing ngriki, kanthi wilujeng kalis ing rubeda nir ing sambekala. Ingkang punika panjenenganipun Bapa/Ibu …………………., mawantu-wantu panyuwunipun wonten ngarsa panjenengan sami, mugi wontena suka lilaning penggalih, paring jurung puja hastawa, puji hastuti dhumateng penganten sarimbit, anggenipun badhe lelumban wonten madyaning bebrayan, tansah atut runtut, manggih bagya mulya ingkang sinedya, rahayu ingkang tinemu, basuki ingkang kaesthi, enggal kaparingan pituwasing patembayatan, momong putra, kanthi prajanjen Brayat Rinancang.

Kaleksananing pahargyan ing kalenggahan punika saged kalampahan, karana sih pambiyantunipun para sanak kadang, pawong mitra, tangga tepalih saha para tamu, ingkang sampun kepareng paring pisumbang awujud punapa kemawon, ingkang sanyata saged hangenthengaken sesanggeman, ingkang punika  panjenenganipun Bapa/Ibu …………………. ngaturaken gunging panuwun ingkang tanpa pepindhan, mugi-mugi sih kadarman panjenengan dados ngamal kasaenan, sahengga pikantuka leliru ingkang satraju, miwah bebingah ingkang malimpah –limpah.

Minangka puputing atur, menawi wonten kuciwaning bojakrama ingkang boten saged anuju prana, hambok bilih wonten anuh ingkang kirang wanuh, lungguh ingkang kirang mungguh, suguh ingkang kirang lawuh, anggen kula hanampi menggah ing rawuh panjenengan sami, mugi lumeberna sih samodra pangaksami.

Semanten ugi, kula minangka talanging atur, hambok bilih anggen kawula matur, wonten tuna dungkaping atur, tutur kelantur-lantur, saha wonten kiranging suba sita ingkang singlar ing reh tata krama, jenang sela wader pari sesondheran, apuranta menawi lepat atur kawula.

Aakhirul kalam, uushikum wanafsi bitaqwallaah.

Wassalamu’alaikum Wr. Wb.